Kushtet e përdorimit dhe të trajtimit të të dhënave

Këto kushte përbëjnë marrëveshjen e plotë ndërmjet operatorit të platformës Prokuro (në vijim «Platforma») dhe çdo subjekti, person juridik ose fizik, që regjistrohet në të si blerës, si shitës ose në të dyja cilësitë (në vijim «Përdoruesi»), dhe hyjnë në fuqi në çastin e pranimit të tyre; personi që kryen regjistrimin deklaron nën përgjegjësinë e tij se është i autorizuar ta përfaqësojë subjektin dhe ta detyrojë atë me këto kushte, ndërsa mospranimi i tyre e bën të pamundur regjistrimin dhe përdorimin e Platformës.

Platforma ka si qëllim të vetëm shkëmbimin dhe pranimin e ofertave tregtare transparente ndërmjet përdoruesve të regjistruar, nëpërmjet publikimit të kërkesave për ofertë, dorëzimit të ofertave, renditjes së tyre dhe përzgjedhjes së ofertës fituese; ndalohet përdorimi i saj për çdo qëllim tjetër, përfshirë reklamimin e pakërkuar, mbledhjen e të dhënave të përdoruesve të tjerë, marrëveshjet e fshehta për ndikimin e çmimeve ose të rezultatit të procedurave, publikimin e kërkesave ose të ofertave fiktive, si dhe çdo veprim që synon të dëmtojë funksionimin, sigurinë ose besueshmërinë e Platformës.

Përdoruesi detyrohet të japë të dhëna të vërteta, të sakta dhe të plota për subjektin dhe për personat e kontaktit, t'i përditësojë ato sa herë ndryshojnë, të ruajë fshehtësinë e kredencialeve të hyrjes dhe mban përgjegjësi të plotë për çdo veprim të kryer nëpërmjet llogarisë së tij.

Platforma është ambient publik dhe, si i tillë, mbi të dhe mbi çdo veprim që kryhet në të zbatohen të gjitha ligjet e Republikës së Shqipërisë, përfshirë legjislacionin civil, tregtar, penal, atë për mbrojtjen e konkurrencës, për mbrojtjen e konsumatorit, për tregtinë elektronike dhe për mbrojtjen e të dhënave personale; në komunikimet, pyetjet, sqarimet, mesazhet, dokumentet dhe çdo përmbajtje tjetër të ngarkuar në Platformë ndalohet përdorimi i fjalëve fyese, shpifëse, kërcënuese, diskriminuese ose që cenojnë dinjitetin e të tjerëve.

Platforma vepron si ndërmjetëse teknike dhe nuk është palë në marrëdhëniet kontraktore që lindin ndërmjet blerësve dhe shitësve; ofertat, çmimet, sasitë, garancitë dhe dokumentet janë përgjegjësi e plotë e subjektit që i paraqet, ndërsa zbatimi i kontratës së lidhur pas përzgjedhjes së fituesit është detyrim i palëve të saj.

Platforma ka të drejtë të pezullojë përkohësisht ose të mbyllë përfundimisht (ndalim i përdorimit) llogarinë e një përdoruesi që, në më shumë se tre raste, si shitës nuk ka furnizuar mallin ose nuk ka kryer shërbimin për të cilin oferta e tij është përzgjedhur fituese, ose, si blerës, pas përfundimit të procedurës së prokurimit është tërhequr pa arsye të justifikuar nga blerja; e njëjta masë mund të merret pa paralajmërim për çdo shkelje të rëndë të këtyre kushteve ose të ligjit.

Të gjitha veprimet që cenojnë integritetin personal ose profesional të individëve, të personave juridikë dhe të subjekteve do të raportohen pranë organeve kompetente, sipas natyrës së problematikës, përfshirë Policinë e Shtetit, Prokurorinë, Autoritetin e Konkurrencës dhe Komisionerin për të Drejtën e Informimit dhe Mbrojtjen e të Dhënave Personale, dhe Platforma do të bashkëpunojë me to duke vënë në dispozicion të dhënat e nevojshme brenda kufijve të ligjit.

Për sa i përket trajtimit të të dhënave, Platforma vepron si kontrollues i të dhënave personale që Përdoruesi i jep gjatë regjistrimit dhe përdorimit, në përputhje me legjislacionin në fuqi për mbrojtjen e të dhënave personale; trajtohen të dhënat identifikuese të subjektit (emri, NIPT/NUIS, adresa, objekti i veprimtarisë), të dhënat e personave të kontaktit (emri, numri i telefonit, adresa e postës elektronike), përmbajtja e kërkesave për ofertë, e ofertave, e dokumenteve dhe e komunikimeve, si dhe të dhëna teknike si adresa IP, data dhe ora e veprimeve dhe gjurmët e sigurisë; këto të dhëna trajtohen për krijimin dhe administrimin e llogarisë, për zhvillimin e procedurave dhe njoftimin e palëve, për ruajtjen e gjurmës së veprimeve, për sigurinë e Platformës, për përmbushjen e detyrimeve ligjore dhe për mbrojtjen e të drejtave të Platformës dhe të përdoruesve, mbi bazën e kontratës, të detyrimit ligjor, të interesit të ligjshëm dhe, aty ku kërkohet, të pëlqimit; të dhënat ruhen për aq kohë sa llogaria është aktive dhe më pas për afatin e nevojshëm për përmbushjen e detyrimeve ligjore e për mbrojtjen në rast mosmarrëveshjesh, dhe mbrohen me masa teknike e organizative të përshtatshme kundër aksesit të paautorizuar, humbjes ose ndryshimit; të dhënat e një procedure u bëhen të njohura përdoruesve të tjerë vetëm në masën që kërkon vetë procedura dhe sipas rregullave të saj.

Përdoruesi jep pëlqimin e tij të shprehur që të dhënat e tij të trajtohen edhe nga palë të treta, si ofrues të shërbimeve të pritjes së të dhënave, të ruajtjes së skedarëve, të postës elektronike, të sigurisë, të analizës dhe të zhvillimit teknik, me qëllim funksionimin, përmirësimin dhe zhvillimin e Platformës sipas nevojave të saj, me kusht që këto palë t'i trajtojnë të dhënat vetëm për këto qëllime, nën detyrimin e konfidencialitetit dhe me masa mbrojtëse jo më të ulëta se ato të përcaktuara këtu.

Përdoruesi ka të drejtë të kërkojë informacion dhe akses në të dhënat e tij, korrigjimin, fshirjen ose kufizimin e trajtimit të tyre, të kundërshtojë trajtimin, të kërkojë transferimin e tyre, të tërheqë në çdo kohë pëlqimin e dhënë pa cenuar ligjshmërinë e trajtimit të kryer më parë, si dhe të paraqesë ankesë pranë Komisionerit për të Drejtën e Informimit dhe Mbrojtjen e të Dhënave Personale; kërkesat dërgohen në adresën asistenca@prokuro.al.

Platforma mund t'i ndryshojë këto kushte duke i njoftuar përdoruesit nëpërmjet Platformës ose me postë elektronike, dhe për ndryshimet thelbësore kërkon pranimin e ri të tyre; vazhdimi i përdorimit pas njoftimit për ndryshimet e tjera vlen si pranim i tyre.

Për çdo mosmarrëveshje që lind nga këto kushte ose nga përdorimi i Platformës zbatohet ligji shqiptar dhe janë kompetente gjykatat e Republikës së Shqipërisë; nëse një dispozitë e këtyre kushteve shpallet e pavlefshme, dispozitat e tjera mbeten në fuqi.

Me shtypjen e butonit «Pranoj kushtet», Përdoruesi deklaron se i ka lexuar, i ka kuptuar dhe i pranon plotësisht këto kushte, përfshirë pëlqimin për trajtimin e të dhënave të përcaktuar më sipër.

Pyetje ose kërkesa për të dhënat tuaja: asistenca@prokuro.al